1	שִׁיר מִזְמוֹר לִבְנֵי קֹרַח לַמְנַצֵּחַ עַל ־ מָחֲלַת לְעַנּוֹת מַשְׂכִּיל לְהֵימָן הָאֶזְרָחִֽי ׃
2	יְהוָה אֱלֹהֵי יְשׁוּעָתִי יוֹם ־ צָעַקְתִּי בַלַּיְלָה נֶגְדֶּֽךָ ׃
3	תָּבוֹא לְפָנֶיךָ תְּפִלָּתִי הַטֵּֽה ־ אָזְנְךָ לְרִנָּתִֽי ׃
4	כִּֽי ־ שָֽׂבְעָה בְרָעוֹת נַפְשִׁי וְחַיַּי לִשְׁאוֹל הִגִּֽיעוּ ׃
5	נֶחְשַׁבְתִּי עִם ־ יוֹרְדֵי בוֹר הָיִיתִי כְּגֶבֶר אֵֽין ־ אֱיָֽל ׃
6	בַּמֵּתִים חָפְשִׁי כְּמוֹ חֲלָלִים ׀ שֹׁכְבֵי קֶבֶר אֲשֶׁר לֹא זְכַרְתָּם עוֹד וְהֵמָּה מִיָּדְךָ נִגְזָֽרוּ ׃
7	שַׁתַּנִי בְּבוֹר תַּחְתִּיּוֹת בְּמַחֲשַׁכִּים בִּמְצֹלֽוֹת ׃
8	עָלַי סָמְכָה חֲמָתֶךָ וְכָל ־ מִשְׁבָּרֶיךָ עִנִּיתָ סֶּֽלָה ׃
9	הִרְחַקְתָּ מְיֻדָּעַי מִמֶּנִּי שַׁתַּנִי תוֹעֵבוֹת לָמוֹ כָּלֻא וְלֹא אֵצֵֽא ׃
10	עֵינִי דָאֲבָה מִנִּי עֹנִי קְרָאתִיךָ יְהוָה בְּכָל ־ יוֹם שִׁטַּחְתִּי אֵלֶיךָ כַפָּֽי ׃
11	הֲלַמֵּתִים תַּעֲשֶׂה ־ פֶּלֶא אִם ־ רְפָאִים יָקוּמוּ ׀ יוֹדוּךָ סֶּֽלָה ׃
12	הַיְסֻפַּר בַּקֶּבֶר חַסְדֶּךָ אֱמֽוּנָתְךָ בָּאֲבַדּֽוֹן ׃
13	הֲיִוָּדַע בַּחֹשֶׁךְ פִּלְאֶךָ וְצִדְקָתְךָ בְּאֶרֶץ נְשִׁיָּֽה ׃
14	וַאֲנִי ׀ אֵלֶיךָ יְהוָה שִׁוַּעְתִּי וּבַבֹּקֶר תְּֽפִלָּתִי תְקַדְּמֶֽךָּ ׃
15	לָמָה יְהוָה תִּזְנַח נַפְשִׁי תַּסְתִּיר פָּנֶיךָ מִמֶּֽנִּי ׃
16	עָנִי אֲנִי וְגֹוֵעַ מִנֹּעַר נָשָׂאתִי אֵמֶיךָ אָפֽוּנָה ׃
17	עָלַי עָבְרוּ חֲרוֹנֶיךָ בִּעוּתֶיךָ צִמְּתוּתֻֽנִי ׃
18	סַבּוּנִי כַמַּיִם כָּל ־ הַיּוֹם הִקִּיפוּ עָלַי יָֽחַד ׃ הִרְחַקְתָּ מִמֶּנִּי אֹהֵב וָרֵעַ מְֽיֻדָּעַי מַחְשָֽׁךְ ׃