1	לַמְנַצֵּחַ ׀ עַֽל ־ הַגִּתִּית לְאָסָֽף ׃
2	הַרְנִינוּ לֵאלֹהִים עוּזֵּנוּ הָרִיעוּ לֵאלֹהֵי יַעֲקֹֽב ׃
3	שְֽׂאוּ ־ זִמְרָה וּתְנוּ ־ תֹף כִּנּוֹר נָעִים עִם ־ נָֽבֶל ׃
4	תִּקְעוּ בַחֹדֶשׁ שׁוֹפָר בַּכֵּסֶה לְיוֹם חַגֵּֽנוּ ׃
5	כִּי חֹק לְיִשְׂרָאֵל הוּא מִשְׁפָּט לֵאלֹהֵי יַעֲקֹֽב ׃
6	עֵדוּת ׀ בִּֽיהוֹסֵף שָׂמוֹ בְּצֵאתוֹ עַל ־ אֶרֶץ מִצְרָיִם שְׂפַת לֹא ־ יָדַעְתִּי אֶשְׁמָֽע ׃
7	הֲסִירוֹתִי מִסֵּבֶל שִׁכְמוֹ כַּפָּיו מִדּוּד תַּעֲבֹֽרְנָה ׃
8	בַּצָּרָה קָרָאתָ וָאֲחַלְּצֶךָּ אֶעֶנְךָ בְּסֵתֶר רַעַם אֶבְחָֽנְךָ עַל ־ מֵי מְרִיבָה סֶֽלָה ׃
9	שְׁמַע עַמִּי וְאָעִידָה בָּךְ יִשְׂרָאֵל אִם ־ תִּֽשְׁמַֽע ־ לִֽי ׃
10	לֹֽא ־ יִהְיֶה בְךָ אֵל זָר וְלֹא תִשְׁתַּחֲוֶה לְאֵל נֵכָֽר ׃
11	אָנֹכִי ׀ יְהוָה אֱלֹהֶיךָ הַֽמַּעַלְךָ מֵאֶרֶץ מִצְרָיִם הַרְחֶב ־ פִּיךָ וַאֲמַלְאֵֽהוּ ׃
12	וְלֹא ־ שָׁמַע עַמִּי לְקוֹלִי וְיִשְׂרָאֵל לֹא ־ אָבָה לִֽי ׃
13	וָֽאֲשַׁלְּחֵהוּ בִּשְׁרִירוּת לִבָּם יֵלְכוּ בְּֽמוֹעֲצוֹתֵיהֶֽם ׃
14	לוּ עַמִּי שֹׁמֵעַֽ לִי יִשְׂרָאֵל בִּדְרָכַי יְהַלֵּֽכוּ ׃
15	כִּמְעַט אוֹיְבֵיהֶם אַכְנִיעַ וְעַל צָרֵיהֶם אָשִׁיב יָדִֽי ׃
16	מְשַׂנְאֵי יְהוָה יְכַֽחֲשׁוּ ־ לוֹ וִיהִי עִתָּם לְעוֹלָֽם ׃ וַֽיַּאֲכִילֵהוּ מֵחֵלֶב חִטָּה וּמִצּוּר דְּבַשׁ אַשְׂבִּיעֶֽךָ ׃