| 1 | לַמְנַצֵּחַ לְדָוִד בַּֽיהוָה ׀ חָסִיתִי אֵיךְ תֹּאמְרוּ לְנַפְשִׁי נודו הַרְכֶם צִפּֽוֹר ׃ |
| 2 | כִּי הִנֵּה הָרְשָׁעִים יִדְרְכוּן קֶשֶׁת כּוֹנְנוּ חִצָּם עַל ־ יֶתֶר לִירוֹת בְּמוֹ ־ אֹפֶל לְיִשְׁרֵי ־ לֵֽב ׃ |
| 3 | כִּי הַשָּׁתוֹת יֵֽהָרֵסוּן צַדִּיק מַה ־ פָּעָֽל ׃ |
| 4 | יְהוָה ׀ בְּֽהֵיכַל קָדְשׁוֹ יְהוָה בַּשָּׁמַיִם כִּסְאוֹ עֵינָיו יֶחֱזוּ עַפְעַפָּיו יִבְחֲנוּ בְּנֵי אָדָֽם ׃ |
| 5 | יְהוָה צַדִּיק יִבְחָן וְרָשָׁע וְאֹהֵב חָמָס שָֽׂנְאָה נַפְשֽׁוֹ ׃ |
| 6 | יַמְטֵר עַל ־ רְשָׁעִים פַּחִים אֵשׁ וְגָפְרִית וְרוּחַ זִלְעָפוֹת מְנָת כּוֹסָֽם ׃ |
| 7 | כִּֽי ־ צַדִּיק יְהוָה צְדָקוֹת אָהֵב יָשָׁר יֶחֱזוּ פָנֵֽימוֹ ׃ |
