| 1 | לְדָוִד מִזְמוֹר חֶֽסֶד ־ וּמִשְׁפָּט אָשִׁירָה לְךָ יְהוָה אֲזַמֵּֽרָה ׃ |
| 2 | אַשְׂכִּילָה ׀ בְּדֶרֶךְ תָּמִים מָתַי תָּבוֹא אֵלָי אֶתְהַלֵּךְ בְּתָם ־ לְבָבִי בְּקֶרֶב בֵּיתִֽי ׃ |
| 3 | לֹֽא ־ אָשִׁית ׀ לְנֶגֶד עֵינַי דְּֽבַר ־ בְּלִיָּעַל עֲשֹֽׂה ־ סֵטִים שָׂנֵאתִי לֹא יִדְבַּק בִּֽי ׃ |
| 4 | לֵבָב עִקֵּשׁ יָסוּר מִמֶּנִּי רָע לֹא אֵדָֽע ׃ |
| 5 | מלושני בַסֵּתֶר ׀ רֵעֵהוּ אוֹתוֹ אַצְמִית גְּֽבַהּ ־ עֵינַיִם וּרְחַב לֵבָב אֹתוֹ לֹא אוּכָֽל ׃ |
| 6 | עֵינַי ׀ בְּנֶֽאֶמְנֵי ־ אֶרֶץ לָשֶׁבֶת עִמָּדִי הֹלֵךְ בְּדֶרֶךְ תָּמִים הוּא יְשָׁרְתֵֽנִי ׃ |
| 7 | לֹֽא ־ יֵשֵׁב ׀ בְּקֶרֶב בֵּיתִי עֹשֵׂה רְמִיָּה דֹּבֵר שְׁקָרִים לֹֽא ־ יִכּוֹן לְנֶגֶד עֵינָֽי ׃ |
| 8 | לַבְּקָרִים אַצְמִית כָּל ־ רִשְׁעֵי ־ אָרֶץ לְהַכְרִית מֵֽעִיר ־ יְהוָה כָּל ־ פֹּעֲלֵי אָֽוֶן ׃ |
