1	לַמְנַצֵּחַ מִזְמוֹר לְדָוִֽד ׃
2	חַלְּצֵנִי יְהוָה מֵאָדָם רָע מֵאִישׁ חֲמָסִים תִּנְצְרֵֽנִי ׃
3	אֲשֶׁר חָשְׁבוּ רָעוֹת בְּלֵב כָּל ־ יוֹם יָגוּרוּ מִלְחָמֽוֹת ׃
4	שָֽׁנֲנוּ לְשׁוֹנָם כְּֽמוֹ ־ נָחָשׁ חֲמַת עַכְשׁוּב תַּחַת שְׂפָתֵימוֹ סֶֽלָה ׃
5	שָׁמְרֵנִי יְהוָה ׀ מִידֵי רָשָׁע מֵאִישׁ חֲמָסִים תִּנְצְרֵנִי אֲשֶׁר חָשְׁבוּ לִדְחוֹת פְּעָמָֽי ׃
6	טָֽמְנֽוּ ־ גֵאִים ׀ פַּח לִי וַחֲבָלִים פָּרְשׂוּ רֶשֶׁת לְיַד ־ מַעְגָּל מֹקְשִׁים שָֽׁתוּ ־ לִי סֶֽלָה ׃
7	אָמַרְתִּי לַיהוָה אֵלִי אָתָּה הַאֲזִינָה יְהוָה קוֹל תַּחֲנוּנָֽי ׃
8	יְהֹוִה אֲדֹנָי עֹז יְשׁוּעָתִי סַכֹּתָה לְרֹאשִׁי בְּיוֹם נָֽשֶׁק ׃
9	אַל ־ תִּתֵּן יְהוָה מַאֲוַיֵּי רָשָׁע זְמָמוֹ אַל ־ תָּפֵק יָרוּמוּ סֶֽלָה ׃
10	רֹאשׁ מְסִבָּי עֲמַל שְׂפָתֵימוֹ יכסומו ׃
11	ימיטו עֲלֵיהֶם גֶּֽחָלִים בָּאֵשׁ יַפִּלֵם בְּמַהֲמֹרוֹת בַּֽל ־ יָקֽוּמוּ ׃
12	אִישׁ לָשׁוֹן בַּל ־ יִכּוֹן בָּאָרֶץ אִישׁ ־ חָמָס רָע יְצוּדֶנּוּ לְמַדְחֵפֹֽת ׃
13	ידעת כִּֽי ־ יַעֲשֶׂה יְהוָה דִּין עָנִי מִשְׁפַּט אֶבְיֹנִֽים ׃ אַךְ צַדִּיקִים יוֹדוּ לִשְׁמֶךָ יֵשְׁבוּ יְשָׁרִים אֶת ־ פָּנֶֽיךָ ׃