1	לַמְנַצֵּחַ בִּנְגִינֹת מַשְׂכִּיל לְדָוִֽד ׃
2	בְּבוֹא הַזִּיפִים וַיֹּאמְרוּ לְשָׁאוּל הֲלֹא דָוִד מִסְתַּתֵּר עִמָּֽנוּ ׃
3	אֱלֹהִים בְּשִׁמְךָ הוֹשִׁיעֵנִי וּבִגְבוּרָתְךָ תְדִינֵֽנִי ׃
4	אֱלֹהִים שְׁמַע תְּפִלָּתִי הַאֲזִינָה לְאִמְרֵי ־ פִֽי ׃
5	כִּי זָרִים ׀ קָמוּ עָלַי וְֽעָרִיצִים בִּקְשׁוּ נַפְשִׁי לֹא שָׂמוּ אֱלֹהִים לְנֶגְדָּם סֶֽלָה ׃
6	הִנֵּה אֱלֹהִים עֹזֵר לִי אֲדֹנָי בְּֽסֹמְכֵי נַפְשִֽׁי ׃
7	ישוב הָרַע לְשֹׁרְרָי בַּאֲמִתְּךָ הַצְמִיתֵֽם ׃ בִּנְדָבָה אֶזְבְּחָה ־ לָּךְ אוֹדֶה שִּׁמְךָ יְהוָה כִּי ־ טֽוֹב ׃ כִּי מִכָּל ־ צָרָה הִצִּילָנִי וּבְאֹיְבַי רָאֲתָה עֵינִֽי ׃