В конец, в песнех разума, Асафу, псалом.
1	Внуши, Боже, молитву мою и не презри моления моего:
2	вонми ми и услыши мя: возскорбех печалию моею, и смятохся
3	от гласа вражия и от стужения грешнича: яко уклониша на мя беззаконие и во гневе враждоваху ми.
4	Сердце мое смятеся во мне, и боязнь смерти нападе на мя:
5	страх и трепет прииде на мя, и покры мя тма.
6	И рех: кто даст ми криле яко голубине? и полещу, и почию.
7	Се, удалихся бегая и водворихся в пустыни.
8	Чаях Бога спасающаго мя от малодушия и от бури.
9	Потопи, Господи, и раздели языки их: яко видех беззаконие и пререкание во граде.
10	Днем и нощию обыдет и по стенам его: беззаконие и труд посреде его, и неправда:
11	и не оскуде от стогн его лихва и лесть.
12	Яко аще бы враг поносил ми, претерпел бых убо: и аще бы ненавидяй мя на мя велеречевал, укрылбыхся от него.
13	Ты же, человече равнодушне, владыко мой и знаемый мой,
14	иже купно наслаждался еси со мною брашен: в дому Божии ходихом единомышлением.
15	Да приидет же смерть на ня, и да снидут во ад живи: яко лукавство в жилищих их, посреде их.
16	Аз к Богу воззвах, и Господь услыша мя.
17	Вечер и заутра и полудне повем и возвещу, и услышит глас мой.
18	Избавит миром душу мою от приближающихся мне: яко во мнозе бяху со мною.
19	Услышит Бог, и смирит я сый прежде век: несть бо им изменения, яко не убояшася Бога.
20	Простре руку свою на воздаяние: оскверниша завет его.
21	Разделишася от гнева лица его, и приближишася сердца их: умякнуша словеса их паче елеа, и та суть стрелы.
22	Возверзи на Господа печаль твою, и Той тя препитает: не даст в век молвы праведнику.
23	Ты же, Боже, низведеши их в студенец истления: мужие кровей и льсти не преполовят дний своих. Аз же, Господи, уповаю на Тя.