1	Жены добрыя блажен есть муж, и число дний его сугубо.
2	Жена добляя веселит мужа своего и лета его исполнит миром.
3	Жена добра часть блага, в части боящихся Господа дана будет.
4	Богатаго же и убогаго сердце благо, во всяко время лице тихо.
5	От трех убояся сердце мое, и от лица четвертаго устрашихся:
6	предания града и собрания народа, и оболгания над смерть, вся тяжестна.
7	Болезнь сердца и сетование жена ревнива о жене,
8	и язва языка всем приобщающаяся.
9	Воловое иго движимо жена лукавна, держайся ея яко емляйся скорпии.
10	Гнев велик жена пиянчива, и студа своего не покрыет.
11	Блуд женский в возвышении очес и бровьми ея познан будет.
12	Над дщерию безстудною утверди стражу, да не попущение обретши употребит себе.
13	Вслед безстудна ока сохранися и не дивися, аще в тя согрешит:
14	яко жажден путник отверзет уста и от всякия воды ближния испиет,
15	прямо всякаго кола сядет и прямо стрелы отверзет тул.
16	Благодать женска возвеселит мужа ея, и кости его утучнит художество ея.
17	Даяние Господне жена молчалива, и несть искупа наказанныя души.
18	Благодать на благодати жена стыдлива,
19	и несть мерило всякое достойное воздержныя души.
20	Солнце восходящее на высоких Господних,
21	и доброта жены добрыя в красоте дому ея:
22	светилник сияя на свещнице святе, и доброта лица на возрасте постояннем.
23	Столпи злати на подстолпиих сребряных, и нозе красни на плеснах добре стоящих.
24	О двоих печально бысть сердце мое, и о третием ярость ми найде:
25	муж борец лишаяся за скудоту, и мужие разумиви аще отриновени будут:
26	возвращаяся от правды на грех, Господь уготовит его на мечь.
27	Едва измется купец от погрешения, и не оправдится корчемник от греха.