1	Паки же отвещав Господь, рече ко иову из облака:
2	ни, но препояши яко муж чресла твоя: вопрошу же тя, ты же ми отвещай.
3	Не отвергай суда моего: мниши ли мя инако тебе сотворша, разве да явишися правдив?
4	Еда мышца ти есть на Господа, или гласом на него гремиши?
5	Приими же высоту и силу, в славу же и в честь облецыся:
6	пусти же ангелы гневом и всякаго укорителя смири,
7	величава же угаси и согной нечестивыя абие:
8	скрый же в землю вне вкупе и лица их безчестия исполни.
9	Исповем, яко может десница твоя спасти.
10	Но убо се, зверие у тебе, траву аки волове ядят:
11	се убо, крепость его на чреслех, сила же его на пупе чрева:
12	постави ошиб яко кипарис, жилы же его (яко уже) сплетены суть,
13	ребра его ребра медяна, хребет же его железо слияно.
14	Сиесть начало создания Господня: сотворен поруган быти ангелы его:
15	возшед же на гору стреминную, сотвори радость четвероногим в тартаре:
16	под всяким древом спит, при рогозе и тростии и ситовии:
17	осеняют же над ним древеса велика с леторасльми и ветви напольныя:
18	аще будет наводнение, не ощутит: уповает, яко внидет иордан во уста его:
19	во око свое возмет его, ожесточився продиравит ноздри.
20	Извлечеши ли змиа удицею, или обложиши узду о ноздрех его?
21	или вдежеши колце в ноздри его? шилом же провертиши ли устне его?
22	возглаголет же ли ти с молением, (или) с прошением кротко?
23	сотворит же ли завет с тобою? поймеши же ли его раба вечна?
24	поиграеши же ли с ним, якоже со птицею, или свяжеши его яко врабия детищу?
25	питаются ли же им языцы, и разделяют ли его финикийстии народи?
26	вся же плавающая собравшеся не подимут кожи единыя ошиба его, и корабли рыбарей главы его.
27	Возложиши же ли нань руку, воспомянув брань бывающую на теле его? и ктому да не будет.