1	Завет положих очима моима, да не помышлю на девицу.
2	И что удели Бог свыше, и наследие всесильнаго от вышних?
3	Увы, пагуба неправдивому и отчуждение творящым беззаконие.
4	Не сам ли узрит путь мой и вся стопы моя изочтет?
5	Аще ходих с посмеятели, и аще потщася нога моя на лесть,
6	стах бо на мериле праведне, виде же Господь незлобие мое.
7	Аще уклонися нога моя от пути, аще и вслед ока моего иде сердце мое, и аще рукама моима прикоснухся даров,
8	да посею убо, а инии да поядят, без корене же да бых был на земли.
9	Аще вслед иде сердце мое жены мужа инаго, и аще приседяй бых при дверех ея,
10	угодна убо буди и жена моя иному мужу, младенцы же мои смирени да будут:
11	ярость бо гнева не удержана, еже осквернити мужа инаго жену:
12	огнь бо есть горяй на вся страны, идеже найдет, из корения погубит.
13	Аще же презрех суд раба моего или рабыни, прящымся им предо мною:
14	что бо сотворю, аще испытание сотворит ми Господь? аще же и посещение, кий ответ сотворю?
15	Еда не якоже и аз бех во чреве, и тии быша? бехом же в томже чреве.
16	Немощнии же, аще когда чесого требоваху, не не получиша, вдовича же ока не презрех.
17	Аще же и хлеб мой ядох един и сирому не преподах от него:
18	понеже от юности моея кормих якоже отец, и от чрева матере моея наставлях:
19	аще же презрех нага погибающа и не облекох его:
20	немощнии же аще не благословиша мя, от стрижения же агнцев моих согрешася плещы их:
21	аще воздвигох на сироту руку, надеяся, яко многа помощь мне есть:
22	да отпадет убо рамо мое от состава, мышца же моя от лактя да сокрушится:
23	страх бо Господень объя мя, и от тягости его не стерплю.
24	Аще вчиних злато в крепость мою и аще на камения многоценная надеяхся,
25	аще же и возвеселихся, многу ми богатству сущу, аще же и на безчисленных положих руку мою:
26	или не видим солнца возсиявшаго оскудевающа, луны же умаляющияся? не в них бо есть:
27	и аще прельстися отай сердце мое, аще и руку мою положив на устах моих лобзах:
28	и сие ми убо в беззаконие превелие да вменится, яко солгах пред Богом вышним.
29	Аще же обрадовахся о падении враг моих, и рече сердце мое: благоже, благоже:
30	да услышит убо ухо мое клятву мою, озлославлен же да буду от людий моих озлобляемь.
31	Аще же и многажды реша рабыни моя: кто убо дал бы нам от плотей его насытитися, зело мне благу сущу?
32	И вне не водворяшеся странник, дверь же моя всякому приходящему отверста бе.
33	Аще же и согрешая неволею, скрых грех мой:
34	не посрамихся бо народнаго множества, еже не поведати пред ними: аще же и оставих маломощнаго изыти из дверий моих тщим недром: (аще бы не убоялся).
35	Кто даст слушающаго мене? руки же Господни аще бых не убоялся, писание же, еже имех на кого,
36	на плещах возложив аки венец, читах,
37	и аще не раздрав его отдах, ничтоже взем от должника:
38	аще на мя когда земля возстена, аще и бразды ея восплакашася вкупе:
39	аще и силу ея ядох един без цены, или аще и душу господина земли взем оскорбих:
40	вместо пшеницы да взыдет ми кропива, а вместо ячменя терние.