1	הַדָּבָר אֲשֶׁר דִּבֶּר יִרְמְיָהוּ הַנָּבִיא אֶל ־ בָּרוּךְ בֶּֽן ־ נֵֽרִיָּה בְּכָתְבוֹ אֶת ־ הַדְּבָרִים הָאֵלֶּה עַל ־ סֵפֶר מִפִּי יִרְמְיָהוּ בַּשָּׁנָה הָֽרְבִעִית לִיהוֹיָקִים בֶּן ־ יֹאשִׁיָּהוּ מֶלֶךְ יְהוּדָה לֵאמֹֽר ׃ ס
2	כֹּֽה ־ אָמַר יְהוָה אֱלֹהֵי יִשְׂרָאֵל עָלֶיךָ בָּרֽוּךְ ׃
3	אָמַרְתָּ אֽוֹי ־ נָא לִי כִּֽי ־ יָסַף יְהוָה יָגוֹן עַל ־ מַכְאֹבִי יָגַעְתִּי בְּאַנְחָתִי וּמְנוּחָה לֹא מָצָֽאתִי ׃ ס
4	כֹּה ׀ תֹּאמַר אֵלָיו כֹּה אָמַר יְהוָה הִנֵּה אֲשֶׁר ־ בָּנִיתִי אֲנִי הֹרֵס וְאֵת אֲשֶׁר ־ נָטַעְתִּי אֲנִי נֹתֵשׁ וְאֶת ־ כָּל ־ הָאָרֶץ הִֽיא ׃
5	וְאַתָּה תְּבַקֶּשׁ ־ לְךָ גְדֹלוֹת אַל ־ תְּבַקֵּשׁ כִּי הִנְנִי מֵבִיא רָעָה עַל ־ כָּל ־ בָּשָׂר נְאֻם ־ יְהוָה וְנָתַתִּי לְךָ אֶֽת ־ נַפְשְׁךָ לְשָׁלָל עַל כָּל ־ הַמְּקֹמוֹת אֲשֶׁר תֵּֽלֶךְ ־ שָֽׁם ׃ ס