1	Аще же кто украдет телца или овцу, и заколет или продаст, пять телцев да воздаст за телца и четыри овцы за овцу.
2	Аще же в подкопании обрящется тать, и язвен умрет, несть ему убийство:
3	аще же взыдет солнце над ним, повинен есть, умрет за него: аще же не имать имения, да продастся за татьбу:
4	аще же ят будет, и обрящется в руце его украденое от осляте до овцы живо, сугубо да отдаст я.
5	Аще же кто потравит ниву или виноград, и пустит скот свой пастися на чужей ниве, да даст от нивы своея по плоду его: аще же всю ниву потравит, лучшая нивы своея и лучшая винограда своего да отдаст.
6	Аще же изшед огнь обрящет терние и запалит гумно, или класы, или ниву, да отдаст, иже возже огнь.
7	Аще же кто даст другу сребро или сосуд сохранити, и украдется из дому мужа того, аще обрящется украдый, да воздаст сугубо:
8	аще же не обрящется украдый, да приидет господин дому пред Бога и да кленется, яко поистинне не слукавствова он о всем положении дружнем.
9	По всей реченней неправде, о теляти и о осляти и о овце, и о ризе и о всей гибели нанесенней, что убо ни было бы, пред Богом да приидет суд обоих, и обвиненный Богом да отдаст сугубо ближнему.
10	Аще же кто даст другу осля или телца, или овцу, или всяк скот хранити, и умрет или погибнет, или пленено будет, и никтоже увесть,
11	клятва да будет Божия между обоими, яко поистинне не слукавствова он о всем ближняго положении, и тако приимет господин его, и да не отдаст:
12	аще же украдено будет от него, да отдаст господину:
13	аще же зверь снеде, да ведет его на звероядину, и не отдаст:
14	аще же кто испросит у друга, и погибнет, или умрет, или пленится, господин же его не будет с ним, отдаст:
15	аще же господин его будет с ним, да не отдаст: аще же наемник есть, да будет ему вместо мзды его.
16	Аще же прельстит кто не обручену девицу, и будет с нею, веном да отвенит ю, (и поймет ю) себе в жену:
17	аще же возбраняя возбранит и не восхощет отец ея дати ю ему в жену, сребро да воздаст отцу, елико есть вено девическо.
18	Волхвом живым быти не попустите.
19	Всякаго со скотом бывающа смертию убиете его.
20	Иже жертву приносит богом, смертию да потребится, но точию Господу единому.
21	И пришелца не озлобите, ниже оскорбите его: пришелцы бо бесте в земли египетстей.
22	Всякия вдовы и сироты не озлобите:
23	аще же злобою озлобите я, и возстенавше возопиют ко мне, слухом услышу глас их
24	и разгневаюся яростию, и побию вы мечем, и будут жены вашя вдовы, и чада ваша сироты.
25	Аще же даси сребро взаем брату нищему иже у тебе, не буди его понуждаяй, ниже наложиши ему лихвы.
26	И аще заложит в залог ризу друг твой, до захождения солнца отдаси ему:
27	есть бо сия покровение ему, сия едина риза стыдения его, в чем спати будет: аще убо возопиет ко мне, услышу его: милостив бо есмь.
28	Богов да не злословиши и князю людий твоих да не речеши зла.
29	Начатки от гумна и от точила твоего да не косниши принести (мне): первенцы сынов твоих да даси мне:
30	тако сотвориши телцу твоему, и овце твоей, и ослу твоему: седмь дний да будет у матери, в осмый же день да отдаси оное мне.
31	Люди святи будете ми, и мяса звероядиннаго да не снесте, псом повержете е.