1	לַמְנַצֵּח בִּנְגִינֹת מִזְמוֹר שִֽׁיר ׃
2	אֱלֹהִים יְחָנֵּנוּ וִֽיבָרְכֵנוּ יָאֵר פָּנָיו אִתָּנוּ סֶֽלָה ׃
3	לָדַעַת בָּאָרֶץ דַּרְכֶּךָ בְּכָל ־ גּוֹיִם יְשׁוּעָתֶֽךָ ׃
4	יוֹדוּךָ עַמִּים ׀ אֱלֹהִים יוֹדוּךָ עַמִּים כֻּלָּֽם ׃
5	יִֽשְׂמְחוּ וִֽירַנְּנוּ לְאֻמִּים כִּֽי ־ תִשְׁפֹּט עַמִּים מִישׁוֹר וּלְאֻמִּים ׀ בָּאָרֶץ תַּנְחֵם סֶֽלָה ׃
6	יוֹדוּךָ עַמִּים ׀ אֱלֹהִים יוֹדוּךָ עַמִּים כֻּלָּֽם ׃
7	אֶרֶץ נָתְנָה יְבוּלָהּ יְבָרְכֵנוּ אֱלֹהִים אֱלֹהֵֽינוּ ׃ יְבָרְכֵנוּ אֱלֹהִים וְיִֽירְאוּ אֹתוֹ כָּל ־ אַפְסֵי ־ אָֽרֶץ ׃