1	לִבְנֵי ־ קֹרַח מִזְמוֹר שִׁיר יְסוּדָתוֹ בְּהַרְרֵי ־ קֹֽדֶשׁ ׃
2	אֹהֵב יְהוָה שַׁעֲרֵי צִיּוֹן מִכֹּל מִשְׁכְּנוֹת יַעֲקֹֽב ׃
3	נִכְבָּדוֹת מְדֻבָּר בָּךְ עִיר הָאֱלֹהִים סֶֽלָה ׃
4	אַזְכִּיר ׀ רַהַב וּבָבֶל לְֽיֹדְעָי הִנֵּה פְלֶשֶׁת וְצוֹר עִם ־ כּוּשׁ זֶה יֻלַּד ־ שָֽׁם ׃
5	וּֽלֲצִיּוֹן ׀ יֵאָמַר אִישׁ וְאִישׁ יֻלַּד ־ בָּהּ וְהוּא יְכוֹנְנֶהָ עֶלְיֽוֹן ׃
6	יְֽהוָה יִסְפֹּר בִּכְתוֹב עַמִּים זֶה יֻלַּד ־ שָׁם סֶֽלָה ׃
7	וְשָׁרִים כְּחֹלְלִים כָּֽל ־ מַעְיָנַי בָּֽךְ ׃