1	לַמְנַצֵּחַ ׀ לִבְנֵי ־ קֹרַח מִזְמֽוֹר ׃
2	כָּֽל ־ הָעַמִּים תִּקְעוּ ־ כָף הָרִיעוּ לֵאלֹהִים בְּקוֹל רִנָּֽה ׃
3	כִּֽי ־ יְהוָה עֶלְיוֹן נוֹרָא מֶלֶךְ גָּדוֹל עַל ־ כָּל ־ הָאָֽרֶץ ׃
4	יַדְבֵּר עַמִּים תַּחְתֵּינוּ וּלְאֻמִּים תַּחַת רַגְלֵֽינוּ ׃
5	יִבְחַר ־ לָנוּ אֶת ־ נַחֲלָתֵנוּ אֶת גְּאוֹן יַעֲקֹב אֲשֶׁר ־ אָהֵב סֶֽלָה ׃
6	עָלָה אֱלֹהִים בִּתְרוּעָה יְהֹוָה בְּקוֹל שׁוֹפָֽר ׃
7	זַמְּרוּ אֱלֹהִים זַמֵּרוּ זַמְּרוּ לְמַלְכֵּנוּ זַמֵּֽרוּ ׃
8	כִּי מֶלֶךְ כָּל ־ הָאָרֶץ אֱלֹהִים זַמְּרוּ מַשְׂכִּֽיל ׃
9	מָלַךְ אֱלֹהִים עַל ־ גּוֹיִם אֱלֹהִים יָשַׁב ׀ עַל ־ כִּסֵּא קָדְשֽׁוֹ ׃ נְדִיבֵי עַמִּים ׀ נֶאֱסָפוּ עַם אֱלֹהֵי אַבְרָהָם כִּי לֵֽאלֹהִים מָֽגִנֵּי ־ אֶרֶץ מְאֹד נַעֲלָֽה ׃