1	הַלְלוּ יָהּ ׀ אוֹדֶה יְהוָה בְּכָל ־ לֵבָב בְּסוֹד יְשָׁרִים וְעֵדָֽה ׃
2	גְּדֹלִים מַעֲשֵׂי יְהוָה דְּרוּשִׁים לְכָל ־ חֶפְצֵיהֶֽם ׃
3	הוֹד ־ וְהָדָר פָּֽעֳלוֹ וְצִדְקָתוֹ עֹמֶדֶת לָעַֽד ׃
4	זֵכֶר עָשָׂה לְנִפְלְאֹתָיו חַנּוּן וְרַחוּם יְהוָֽה ׃
5	טֶרֶף נָתַן לִֽירֵאָיו יִזְכֹּר לְעוֹלָם בְּרִיתֽוֹ ׃
6	כֹּחַ מַעֲשָׂיו הִגִּיד לְעַמּוֹ לָתֵת לָהֶם נַחֲלַת גּוֹיִֽם ׃
7	מַעֲשֵׂי יָדָיו אֱמֶת וּמִשְׁפָּט נֶאֱמָנִים כָּל ־ פִּקּוּדָֽיו ׃
8	סְמוּכִים לָעַד לְעוֹלָם עֲשׂוּיִם בֶּאֱמֶת וְיָשָֽׁר ׃
9	פְּדוּת ׀ שָׁלַח לְעַמּוֹ צִוָּֽה ־ לְעוֹלָם בְּרִיתוֹ קָדוֹשׁ וְנוֹרָא שְׁמֽוֹ ׃
10	רֵאשִׁית חָכְמָה ׀ יִרְאַת יְהוָה שֵׂכֶל טוֹב לְכָל ־ עֹשֵׂיהֶם תְּהִלָּתוֹ עֹמֶדֶת לָעַֽד ׃